चारलेन सडक विस्तारको माग गर्दै संघर्ष समितिले बुझायो राप्तीमा ध्यानाकर्षण पत्र
तुलबहादुर कवँर मगर
मसुरिया, १२ मंसिर । धानखोला–लमही सडक खण्डलाई चार लेनमा विस्तार गर्नुपर्ने मागसहित ‘धानखोला–लमही चार लेन सडक निर्माण संघर्ष अभियान’ ले राप्ती गाउँपालिकामा ध्यानाकर्षण पत्र बुझाएको छ ।
संघर्ष अभियानका संयोजक प्रकाश शाहीले शुक्रबार गाउँपालिकाका अध्यक्ष प्रकाश विष्टलाई ध्यानाकर्षण पत्र बुझाउनुभएको हो । ध्यानाकर्षण पत्रमा उल्लेख भएअनुसार मंसिर ९ गते एमसिए नेपालका प्रतिनिधिसँग भएको भेटमा सो सडकलाई दुई लेनमै अघि बढाउने तयारी भइरहेको जानकारी गराइएको थियो । तर स्थानीयको निरन्तर सुझाव, प्रदेश राजधानी क्षेत्रको सम्भावित विस्तार तथा तीव्र गतिमा बढ्दै गएको शहरीकरणलाई हेर्दा चार लेनको आवश्यकता अपरिहार्य भएको समितिको तर्क छ । लुम्बिनी प्रदेशको राजधानी देउखुरी क्षेत्र भविष्यमा व्यापारिक केन्द्र, आवासीय संरचना, औद्योगिक विकास तथा प्रदेश स्तरीय सञ्जालको मुख्य आधार बन्न सक्ने भएकाले यो सडकलाई दीर्घकालीन दृष्टिले चार लेनमा विस्तार गर्नु आवश्यक रहेको ध्यानाकर्षण पत्रमा उल्लेख छ । “दुई लेनले प्रदेश राजधानीको भविष्यका पूर्वाधार आवश्यकताहरू धान्न सक्दैन,” पत्रमा भनिएको छ, “चार लेनमा निर्माण नगर्नु आगामी विकास योजनामा प्रत्यक्ष अवरोध हुनेछ ।”
मंसिर १० गते प्रदेशका मुख्यमन्त्रीसँग भएको भेटमा पनि समितिले यही माग दोहोर्याएको थियो। तर एमसिए नेपालले टेन्डर प्रक्रिया दुई लेनकै मोडालिटीमा अघि बढाउन खोज्नु जनताको आकांक्षाविपरीत रहेको समितिको आरोप छ । स्थानीयले यसलाई विकास योजनालाई संकुचित बनाउने गलत निर्णयको रूपमा लिएका छन् । सडक विस्तार रोकिएमा बढ्दो यातायात व्यवस्थापनमा समस्या आउने, स्थानीय व्यवसाय विस्तार अवरुद्ध हुने तथा भविष्यमा महानगरीय संरचना विकास गर्ने योजनामा चुनौती सिर्जना हुने तर्क समितिको छ। देउखुरी क्षेत्रको आन्तरिक सञ्जाल, आर्थिक गतिविधि र राजधानीको दीर्घकालीन महत्वलाई ध्यानमा राख्दै चार लेन विस्तार अनिवार्य रहेको समितिले जनाएको छ ।
पत्रमा चेतावनी दिँदै भनिएको छ, “यदि जनताको जायज माग बेवास्ता गर्दै दुई लेनकै प्रक्रिया अघि बढाइयो भने हामी चरणबद्ध संघर्षमा उत्रिन बाध्य हुनेछौँ । ध्यानाकर्षण पत्र बुझ्दै गाउँपालिका अध्यक्ष प्रकाश विष्टले जनताको चासोलाई सम्बोधन गर्न आवश्यक प्रक्रियागत पहल अघि बढाइने बताउँदै, यश विषयलाई प्रदेश तथा संघीय तहसम्म औपचारिकरूपमा प्रस्तुत गर्ने आश्वासन दिनुभएको छ । संघर्ष समितिले आगामी दिनमा सरोकारवालासँग थप छलफल, स्थानीयस्तरमा अभियान विस्तार तथा तथ्यांकसहितको प्राविधिक अध्ययनमार्फत चार लेन विस्तारको मागलाई अझ सशक्त बनाउने तयारी गरेको जनाएको छ ।
