अभियान बचत तथा ऋण सहकारी संस्थाको आठौं वार्षिक साधारण सभा सम्पन्न

आलोक भावुक

गढवा, १३ मंसिर । अभियान बचत तथा ऋण सहकारी संस्था लिमिटेड गढवा–३ को आठौं वार्षिक साधारण सभा शनिबार गढवा–३ गोबरडिहामा सम्पन्न भएको छ । कार्यक्रम संस्थाका अध्यक्ष कुलराज कुमालको अध्यक्षता र गढवा गाउँपालिका सहकारी शाखाका प्रमुख अशोक कुमार यादवको प्रमुख आतिथ्यमा सम्पन्न भएको हो ।

प्रमुख अतिथि यादवले सहकारीले अब उत्पादनमुखी क्षेत्रमा पुँजी परिचालन गर्नुपर्ने आवश्यकता औंल्याउँदै सहकारीको लगानी सुरक्षित रहन, जोखिम न्यून हुन र आय–आर्जनमा टेवा पुग्न उत्पादनमुखी लगानी नै सर्वोत्तम विकल्प भएको बताए । उनका अनुसार ऋणी सदस्यहरूले ऋण लिएर केवल उपभोगका लागि प्रयोग नगरी व्यवसाय, उद्यम तथा उत्पादनमा लगानी गरे मात्र सहकारीको वास्तविक उपलब्धि देखापर्ने र सहकारी क्षेत्र सुदृढ बन्दै जानेछ ।

साधारण सभामा सहकारीका अध्यक्ष कुलराज कुमालले वार्षिक प्रगति प्रतिवेदन प्रस्तुत गर्दै संस्थाले पछिल्लो वर्ष उपलब्धि, चुनौती र आगामी कार्यदिशाबारे विस्तृत जानकारी दिए । उनले आगामी वर्षमा उत्पादनमुखी ऋण प्रवाहलाई प्रभावकारी बनाउने, डिजिटल प्रणाली थप विस्तार गर्ने, जोखिम व्यवस्थापनलाई कडाइका साथ लागू गर्ने तथा सदस्य अभिमुखीकरण र वित्तीय साक्षरता कार्यक्रमलाई प्राथमिकता दिने नीतिगत योजना सार्वजनिक गरे । आर्थिक वर्ष २०८१/०८२ को लेखापरीक्षण प्रतिवेदन व्यवस्थापक सहायक शिवा केसीले प्रस्तुत गर्नुभयो भने आन्तरिक लेखा परीक्षण समितिका संयोजक दीपक कुमार चौधरीले २२ करोड १५ लाख ५१ हजार ७ सय ८१ रुपैयाँ बराबरको आय–व्यय प्रतिवेदन प्रस्तुत गर्दै सहकारीको वित्तीय स्थिति सुदृढ हुँदै गएको जानकारी दिए ।

साधारण सभाको अवसरमा सहकारीले पत्रकार सम्मान कार्यक्रमसमेत आयोजना गरेको थियो । समुदायसेवा, सामाजिक उत्तरदायित्व, मानवीय भावना र सकारात्मक नेतृत्वमार्फत समाजमा प्रेरणादायी भूमिका निर्वाह गरेको कदरस्वरूप गढवा गाउँपालिका प्रेस संयोजक तथा नेपाल रेडक्रस उपशाखा गढवाका सचिव आलोक भावुक, युगबोध राष्ट्रिय दैनिकका संवाददाता शिवराज पन्थी र रेडियो साझा आवाजका स्टेशन म्यानेजर दुखहरण यादवलाई विशेष सम्मानपत्र प्रदान गरिएको थियो । “सहकार्य हाम्रो संस्कार, उन्नति र विकास हाम्रो अधिकार” भन्ने मूल नारासहित आदर्श रात्री आधारभूत विद्यालयको प्राङ्गणमा आयोजित साधारण सभा उपाध्यक्ष देवकिशोर चौधरीको स्वागत मन्तव्यबाट सुरु भएको थियो । कार्यक्रमको सहजीकरण सहकारीका शेरर सदस्य भगवती चौधरीले गरेका हुन ।