भालुवाङ अस्पतालमा पहिलो पटक ओरिफ प्लेटिङ राखेर सफल सर्जरी

भिसुन शाही

भालुबाङ, मंसिर १२ । राप्ती गाउँपालिका–४ मौरीघाटका ३३ वर्षीय अमर बहादुर, जो रोजगारीका सिलसिलामा भारतमा बस्ने गर्थे । मोटरसाइकल दुर्घटनामा परि हात भाँचिएपछि उपचारका लागि नेपाल फर्किए । भारतमा उपचार महँगो हुने भएकाले उनी उपचारका लागि नेपाल आएका हुन । घर आए लगत्तै उनलाई कहा जाउँ भन्ने अन्यौलता छायो । उनी नजिकै रहेको भालुवाङ अस्पतालमा चेकअपका निम्ति गए ।

चिकित्सिकको सल्लाह बमोजिम उनको सर्जरी भालुबाङ अस्पतालमै गर्ने निर्णय भयो । चिकित्सकले उनको भाँचिएको हातमा ओरिफ प्लेटिङ राखेर सर्जरी गर्ने निधो गरे । अन्तत: ओरिफ प्लेटिङ राखेर चिकित्सकको पहिलो प्रयासबाट सर्जरी सफल भयो । अर्थोपेडिक सर्जन डा. आकाश बेलबासे, सहायक डा. राजु थापा, वरिष्ठ एनेस्थेसिया मधु कुमार सुनार, तथा स्टाफ नर्स मनिषा अधिकारीको टोलीले सफल सर्जरी गरेको हो ।

अस्पतालका अनुसार सर्जरी सफल भएको छ र उनलाई आजै डिस्चार्ज गर्ने तयारी भइरहेको छ । सोही प्रकारको उपचारका लागि बाहिरी जिल्लामा ८०–९० हजार रुपैयाँसम्म खर्च हुने गर्दछ । तर भालुवाङ अस्पतालमा मात्र ७ हजार रुपैयाँमै सम्पूर्ण प्रक्रिया सम्पन्न गरिएको अस्पतालले जनाएको छ । यसले स्थानीय स्तरमै कम खर्चमा प्रभावकारी र गुणस्तरीय सेवा उपलब्ध गराउन भालुवाङ अस्पताल सक्षम रहेको पुष्टि समेत गरेको छ ।