जनताको मन नजितेसम्म दुई–तिहाइको पनि काम छैन : प्रचण्ड

टेकबहादुर पुन

दाङ, १३ मंसिर । नेपाली कम्युनिष्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले देशमा विगतमा बनेको दुई–तिहाइको सरकार जनताको मन जित्न असफल भएको स्पष्ट रूपमा उल्लेख गरेका छन । उनले नेतृत्वको मुख्य आधार जनविश्वास भएकाले चुनावी परिणाम मात्र पर्याप्त नहुने धारणा व्यक्त गरे ।

दाङको लमहीमा आयोजित नेपाली कम्युनिष्ट पार्टी लुम्बिनी प्रदेशस्तरीय एकता सन्देश सभालाई सम्बोधन गर्दै प्रचण्डले पार्टी एकता चुनाव केन्द्रित अभियान नभई दीर्घकालीन राजनीतिक स्थिरता, सुधार र आत्मालोचना गर्ने प्रक्रिया भएको बताए । उनले विगतमा दुई–तिहाइ बहुमत प्राप्त सरकारले छिनभरमै सत्ता गुमाउनुको मुख्य कारण ‘जनताको मुटु नजित्न सक्नु’ रहेको उल्लेख गर्दै, “मैले पहिलेदेखि नै भन्दै आएको कुरा आज पनि उत्तिकै सान्दर्भिक छ— जनताको सामु दुई–तिहाइ पनि काम लागेन,” भने ।

कार्यक्रममा राजनीतिक नेतृत्वमा देखिएका कमजोरी र गल्तीहरूको खुलेर समीक्षा गर्नुपर्ने आवश्यकता रहेकोमा प्रचण्डले जोड दिए । उनले विगतमा कसको कहाँ गल्ती भयो, कुन मोडमा विभाजन बढ्यो, कसरी अविश्वास सिर्जना भयो भन्ने विषयमा सबै नेताले गम्भीरतापूर्वक ध्यान दिनुपर्ने बताए । प्रचण्डले कार्यक्रममा उपस्थित विशाल जनसमूह, विभिन्न घटक र तह–स्तरका कार्यकर्ताको उपस्थिति हेर्दा कम्युनिष्ट शक्तिको पुनः एकताको लागि वातावरण सहज बन्दै गएको विश्वास व्यक्त गरे । उनले भने, “हामी जहाँ पुगेका छौँ, जनस्तरमा जेएनजेटदेखि सबैले हामीलाई साथ र विश्वास दिएका छन्। आजको उपस्थिति नै एकताको अनुमोदन हो ।”

उनले सामाजिक सञ्जालमा मात्रै सक्रिय रहेर नेतृत्व खोज्ने प्रवृत्तिमाथि प्रश्न उठाउँदै, “इतिहासमा योगदान नदिएका, भूमिगत संघर्ष र जोखिम नबोकेका व्यक्तिहरूले केवल सामाजिक सञ्जालको लोकप्रियताले मात्र पार्टी संचालन गर्न सक्दैनन्,” भन्दै नेतृत्व जिम्मेवारीका लागि राजनीतिक यात्रा, सिद्धान्त र योगदान अनिवार्य हुने बताए । कार्यक्रमका विशिष्ट अतिथि तथा पार्टीका सह–संयोजक, पूर्वप्रधानमन्त्री माधवकुमार नेपालले अहिले पार्टीको मुख्य लक्ष्य संगठनलाई देशको उत्पादन, रोजगारी तथा आर्थिक पुनरुत्थानसँग जोड्नु रहेको बताए । उनले जनताले अनुभूति गरिरहेको वास्तविक समस्या—महँगी, बेरोजगारी, कृषि संकट, औद्योगिक अविकास—लाई प्राथमिकतामा राखेर पार्टीको भूमिकालाई पुनः परिभाषित गर्ने समय आएको स्पष्ट पारे । नेपालले भने, “एकता सामान्य होइन, आवश्यक र युगसापेक्ष आवश्यकता हो । पछिल्लो राजनीतिक घटनाक्रम अनुसार पार्टीलाई रुपान्तरण गरेर अघि बढ्छौँ ।”

कार्यक्रममा रहेका अन्य वरिष्ठ नेताहरूले पनि राजनीतिक सुधार, एकता र राष्ट्रिय हितका एजेण्डामा जोड दिए । पूर्वगृहमन्त्री बामदेव गौतमले राजनीतिक दलहरू विगतका गल्तीबाट पाठ सिक्दै जिम्मेवार र उत्तरदायी बनेर अघि बढ्नुपर्ने बताए । उनले देशमा बारम्बार देखिएको अस्थिरता र पार्टीभित्रका विवादले विकास र सु–शासनलाई कमजोर बनाएको उल्लेख गर्दै, सबै दल र नेताले आत्मसुधारतर्फ उन्मुख हुनुपर्ने धारणा राखे । अर्का पूर्वगृहमन्त्री भिम रावलले नेपालको राष्ट्रियतालाई राजनीतिक एजेन्डाको केन्द्रमा राखेर पार्टी काम गर्ने बताए । उनले भूराजनीति, खुला सिमाना, आन्तरिक हस्तक्षेप र आर्थिक निर्भरता जस्ता मुद्दा ‘राष्ट्रिय अस्तित्व’सँग गाँसिएको बताउँदै, त्यसमा प्रत्येक कम्युनिष्ट कार्यकर्ताले स्पष्ट धारणा बनाउनु आवश्यक रहेको उल्लेख गरे ।

पूर्वअर्थमन्त्री वर्षमान पुनले लुम्बिनी प्रदेशस्तरीय एकता सन्देश सभाले कम्युनिष्ट आन्दोलनको वर्तमान अवस्था र भविष्यको मूल्यांकन गर्न सहयोग गर्ने विश्वास व्यक्त गरे । उनले यी सभाहरूले कार्यकर्तामा उत्पन्न उत्साहले संगठनलाई अझ सुदृढ बनाउने बताए । एकता सन्देश सभा लुम्बिनी प्रदेश इन्चार्ज चक्रपाणी खनाल ‘बलदेव’को अध्यक्षतामा सम्पन्न भएको थियो । प्रदेश नेतृत्वले पार्टीभित्र देखिएका विवाद समाधान, जनस्तरमा पार्टीको उपस्थिति सुदृढीकरण र एकीकृत अभियानहरूको प्रभावकारी कार्यान्वयनका लागि यो सभा महत्वपूर्ण कदम भएको जनाएको छ ।

दाङ–देउखुरीका हजारौं कार्यकर्ता सहभागी भएको सभामा पार्टीका शीर्ष नेताहरूको सामूहिक उपस्थिति र एक स्वरले बोलेका सन्देशले कम्युनिष्ट एकता अब व्यवहारिक चरणमा प्रवेश गरिरहेको संकेत गरेको सहभागीहरूले बताए । सभाको समग्र प्रवृत्ति हेर्दा कम्युनिष्ट नेतृत्वले अब चुनावी अंकगणितभन्दा बढी जनतामाथि विश्वास कसरी पुनः स्थापित गर्ने भन्ने विषयलाई मुख्य कार्यसूचीको रूपमा अघि सारेको देखिन्छ । प्रचण्डलगायत शीर्ष नेताहरूले बारम्बार जनताको मन जित्ने, भोगेका कठिनाइ बुझ्ने र उत्पादनमुखी अर्थतन्त्र निर्माण गर्न सकिने मार्गमा पार्टी उन्मुख हुने प्रतिवद्धता जनाएका छन । सभाले कम्युनिष्ट आन्दोलनका विभिन्न धारहरूलाई एक ठाउँमा ल्याउने प्रयासलाई थप गति दिएको र राजनीतिक सुधारको सन्देश स्पष्ट रूपमा प्रसारित गरेको नेताहरूको भनाइ थियो ।