देउखुरीमा टिप्पर र मोटरसाईकिल ठोक्किदा एकजनाको मृत्यु, एक घाईते

भिसुन शाही
भालुबाङ । देउखुरीमा टिप्पर र मोटरसाईकिल ठोक्किदा एकजनाको मृत्यु भएको छ ।

गढवा गाउँपालिका–१, धोद्रे पुल नजिक आईतबार बिहान करिब ६ बजे टिप्पर र मोटरसाइकल ठोक्किँदा एकजनाको मृत्यु भएको हो । दुर्घटनामा प्युठान ऐरावती-५ निवासी मोटरसाईकिल सवार १९ वर्षीय सुशील थापाको घटनास्थलमा नै मृत्यु भएको प्रहरीले जनाएको छ । मोटरसाईकल चालक सोही ठाउँ निवासी २२ बर्षिय प्रचण्ड थापा भने घाईते भएका छन् । उनको भालुवाङ अस्पतालमा उपचार भईरहेको छ ।

अस्थाई प्रहरी पोष्ट काँलाकाटेका अनुसार चन्द्रौटाबाट पश्चिम जाँदै गरेको रा ८ ख ८२५९ नम्बरको टिप्पर र प्युठानबाट बुटवल आउँदै गरेको लु ३८ प ८३९० नम्बरको मोटरसाइकल आपसमा ठोक्किएर दुर्घटना भएको हो । टिप्पर र चालक प्रहरीको नियन्त्रणमा छन् । घटनाबारे अनुसन्धान भईरहेको ईलाका प्रहरी कार्यालय गढवाका प्रमुख डवल बहादुर बमले जानकारी दिए ।